Prifddinas Cymru, Caerdydd

Gwnewch ein dinas yn gartref i chi

O ran dewis ble i astudio, nid dod o hyd i’r cwrs iawn yw popeth – mae hefyd yn ymwneud â dewis y lle y byddwch chi’n treulio blynyddoedd nesaf eich bywyd. Er bod gan ein dinas enw da yn fyd-eang, mae yna deimlad lleol iddi – ac mae’n un o’r cymunedau mwyaf cyfeillgar y gallech obeithio amdani. Fe welwch fod poblogaeth brysur o fyfyrwyr wedi’u lleoli’n bennaf yn y Rhath a Cathays, dwy ardal brysur yn llawn caffis, bariau, tafarndai a siopau cynaliadwy annibynnol, y ddau le o fewn pellter cerdded i ganol y ddinas.

Dinas ar gyfer cerddoriaeth a diwylliant

Mae Caerdydd yn ymfalchïo yn ei sîn gerddoriaeth wefreiddiol. Yn gartref i leoliadau indi llai sy’n dathlu talent cartref, fel Clwb Ifor Bach, Jacobs Roof Garden a’r Tramshed, fe welwch fandiau o fri rhyngwladol yn Arena Utilita Caerdydd a rhai o artistiaid mwyaf y byd yn perfformio yn Stadiwm Principality. Os byddwch yma yn yr haf gallwch wylio llu o artistiaid yn perfformio yn erbyn cefndir hanesyddol castell Caerdydd yn y dewis helaeth o gigs a gynhelir bob haf.

Dinas ar gyfer cerddoriaeth a diwylliant

Dewch i weld sioe yn Theatr y Sherman yn Cathays, comedi byw yn The Glee Club ym Mae Caerdydd, neu ffilm yn un o bedair sinema amlbleth Caerdydd, Sinema Everyman a llond llaw o sinemâu dros dro yng Nghastell Caerdydd a lleoliadau awyr agored ledled y ddinas.

Mae adeilad eiconig Canolfan Mileniwm Cymru ym Mae Caerdydd yn lleoliad theatr a chelfyddydau byd-enwog, sy’n ddelfrydol ar gyfer ffans cerddoriaeth, ac yng Nghanolfan Gelfyddydau Chapter yn Nhreganna fe gewch chi sinema, theatr gyfoes, bar a chaffi i gyd mewn un.

Dinas ar gyfer bwyd a diod

Os am fwyd, ewch ar eich union i Farchnad hanesyddol Caerdydd yng nghanol y ddinas. Yn masnachu ers y 1700au, mae Marchnad Caerdydd bellach yn lleoliad i werthwyr bwyd stryd annibynnol, siopau dillad vintage, bwyd traddodiadol Cymreig (cacennau cri cynnes yn syth o’r planc!) a choffi artisan.

Mae’r ddinas yn cynnig y siopau cadwyn enwog ynghyd â sîn fwyd annibynnol gyda digwyddiadau a gwyliau dros dro rheolaidd ledled y ddinas, fel y Street Food Circus.

Dinas ar gyfer bwyd a diod

Cewch dafarndai traddodiadol, bariau coctel, a bariau cwrw crefft ochr yn ochr â chymysgedd o glybiau nos sydd i gyd yn cynnal nosweithiau wythnosol ar wahanol themâu i fyfyrwyr. Yn dibynnu ar eich syniad o noson allan, mae gan Gaerdydd hefyd lu o leoliadau adloniant cymdeithasol, fel caffis gemau bwrdd, bariau arcêd retro a bariau gemau cystadleuol.

Mae lleoliadau unigryw fel y DEPOT – gofod annibynnol gyda phrofiadau yn ganolog iddo, a sefydlwyd gan Nick Saunders, un o raddedigion Marchnata Met Caerdydd – yn cynnig canolbwynt ar gyfer bwyd stryd, digwyddiadau byw a’r BINGO LINGO enwog.

Dinas ar gyfer chwaraeon

Treuliwch eich penwythnosau yng Nghaerdydd yn mwynhau’r awyrgylch gyda llu o wahanol fathau o chwaraeon. O bêl-droed yn Stadiwm Dinas Caerdydd, criced rhyngwladol yng Ngerddi Sophia, hoci iâ gyda Devils Caerdydd ym Mae Caerdydd ac, wrth gwrs, rygbi rhyngwladol yn Stadiwm Principality, mae gan Gaerdydd gyfoeth o ddigwyddiadau i’ch diddanu.

Ac os ydych chi am fod yng nghanol y dorf, cymerwch ran yn ras flynyddol 10k Caerdydd a Hanner Marathon Caerdydd, gyda marathon llawn dafliad carreg i ffwrdd yng Nghasnewydd.

Dinas antur (a thu hwnt)

I’r rhai sy’n chwilio am antur, dringo dan do, rafftio dŵr gwyn, sglefrio iâ neu nofio mewn pwll maint Olympaidd o’r radd flaenaf – maen nhw i gyd yma ar garreg eich drws.

Neu gallwch fwynhau rhai o gyfleoedd syrffio ac arfordira gorau gwledydd Prydain, a beicio, heicio neu farchogaeth ym Mharc Cenedlaethol Bannau Brycheiniog, i gyd o fewn awr i’r ddinas. Caerdydd yw'r ganolfan berffaith ar gyfer archwilio popeth sydd gan Gymru i'w gynnig.