Met Caerdydd ar frig rhestrau cyflogadwyedd yng Nghymru am flwyddyn arall
Mae Prifysgol Metropolitan Caerdydd wedi cael ei rhestru fel y brifysgol orau yng Nghymru o ran cyflogadwyedd unwaith yn ragor.
Mae'r arolwg Canlyniadau Graddedigion diweddaraf, a ryddhawyd heddiw, yn dangos bod 94.4 y cant o raddedigion Met Caerdydd mewn rhyw fath o waith neu astudiaeth bellach 15 mis ar ôl graddio.
Mae hyn yn gosod Prifysgol Metropolitan Caerdydd yn gyntaf yng Nghymru, o flaen Prifysgol Abertawe gyda 94.1 y cant a Phrifysgol Caerdydd gyda 93.6 y cant. Roedd Met Caerdydd hefyd ar frig canlyniadau arolwg Canlyniadau Graddedigion yn 2024.
Mae arolwg Canlyniadau Graddedigion yn arolwg blynyddol a anfonir at bob myfyriwr sy'n gadael Addysg Uwch yn y DU 15 mis ar ôl iddynt orffen eu hastudiaethau. Mae HESA, yr Asiantaeth Ystadegau Addysg Uwch, yn berchen arno ac mae'n cael ei weithredu, a dyma arolwg cymdeithasol blynyddol mwyaf y DU ac mae'n casglu safbwyntiau a statws presennol graddedigion diweddar.
Dywedodd yr Athro Julia Longville, Deon Addysgu a Dysgu ym Mhrifysgol Metropolitan Caerdydd: "Mae'r rhain yn ganlyniadau gwirioneddol foddhaol i Met Caerdydd. Mae'n wych gweld cynifer o'n myfyrwyr, 74.8% i gyd, yn symud ymlaen i gyflogaeth lefel graddedig neu astudiaeth bellach sy'n gynnydd o'i gymharu â'r llynedd er gwaethaf marchnad lafur heriol. Gan ein bod ni’n dathlu graddio’r wythnos hon, mae gwylio ein myfyrwyr yn croesi’r llwyfan, gan wybod bod llawer ohonyn nhw’n mynd i yrfaoedd boddhaol, yn hynod werth chweil. Mae'r canlyniadau hyn yn adlewyrchu gwaith caled ein myfyrwyr a'n staff, ac mae'n wych gweld hwn oll yn dwyn ffrwyth.”
Mae 61% o raddedigion Met Caerdydd hefyd yn aros yng Nghymru i weithio, ac mae’r mwyafrif helaeth o'r rhain yn Rhanbarth Prifddinas Caerdydd, gan ddangos yr effaith gadarnhaol sydd gan raddedigion y Brifysgol ar yr economi leol. Y tu allan i Gymru, Bryste a Llundain yw'r cyrchfannau mwyaf poblogaidd nesaf i raddedigion Met Caerdydd ddod o hyd i waith.
Mae rhagor o wybodaeth am yr Arolwg Canlyniadau Graddedigion ar gael ar dudalen we Met Caerdydd.