Prifysgol Metropolitan Caerdydd yn ennill Gwobr Rhagoriaeth Cymdeithas Tenis Prydain (LTA) am Brifysgol y Flwyddyn 2025
Mae Prifysgol Metropolitan Caerdydd wedi ennill y Wobr Rhagoriaeth yn y categori Prifysgol y Flwyddyn yng Ngwobrau Tenis 2025 y Gymdeithas Tenis Prydain (LTA), gan gydnabod ei chyfraniad eithriadol i denis prifysgol a chymunedol. LTA yw’r corff llywodraethu cenedlaethol ar gyfer tenis ym Mhrydain Fawr, Ynysoedd y Sianel ac Ynys Manaw.
Mae Gwobr Rhagoriaeth y Brifysgol gan yr LTA yn anrhydedd genedlaethol sy’n cydnabod sefydliadau sy’n cyflwyno effaith ac arloesedd eithriadol ym maes tenis prifysgol. Yn wahanol i Wobrau Cenedlaethol yr LTA, sy’n cydnabod un enillydd yn unig, mae’r Gwobrau Rhagoriaeth yn caniatáu i’r panel beirniadu dynodi rhaglenni sydd wedi dangos llwyddiant ysgubol y tu hwnt i’r rhestr fer derfynol.
Cyflwynwyd y wobr yn ystod Pencampwriaeth Ryngwladol Lexus Eastbourne 2025, lle cafodd cynrychiolwyr o Brifysgol Metropolitan Caerdydd eu gwahodd i gyflwyniad ar y cwrt ac i gymryd rhan mewn sesiwn C&A gyda’r chwaraewr derfynol yn Wimbledon (dyblau cymysg), Harriet Dart.
Mae Tennis Met Caerdydd wedi gweld twf sylweddol dros y blynyddoedd diwethaf. Bellach mae’n cael ei gydnabod fel Prifysgol y Flwyddyn gan Tennis Cymru ar gyfer 2024 a 2025 ac mae’n gartref i’r unig ganolfan tenis dan do ar gampws prifysgol yng Nghymru. Mae’r rhaglen hefyd yn cynnal y Rhaglen Perfformiad Cenedlaethol ar y cyd â Tennis Cymru, yn cefnogi dros 100 o blant yr wythnos drwy raglen hyfforddi ieuenctid ffyniannus, ac yn ddiweddar lansiodd fenter denis cymunedol newydd ym Meysydd Llandaf fel rhan o Strategaeth Parciau Tennis Cymru.
Dywedodd Billy Barclay, Pennaeth Tennis ym Met Caerdydd: “Rydym yn hynod falch o dderbyn y gydnabyddiaeth hon gan yr LTA. Mae’n adlewyrchu nid yn unig ein llwyddiant cystadleuol, ond hefyd y rhaglen tenis cynhwysol a chyrhaeddgar yr ydym wedi’i datblygu, o feithrin athletwyr perfformiad i wneud tenis yn fwy hygyrch ar draws ein cymuned leol. Mae’r wobr hon yn dyst i ymroddiad ein staff, ein myfyrwyr a’n partneriaid.”
Mae’r Brifysgol hefyd yn cynnal cystadlaethau tenis proffesiynol yn rheolaidd mewn partneriaeth â digwyddiadau’r UTR Pro Tour ac Amazon, gan godi proffil tenis yng Nghymru a’r Deyrnas Unedig.