Tad o Gaerdydd yn ailhyfforddi fel athro ac yn graddio gydag anrhydedd dosbarth cyntaf ar ôl marwolaeth ei wraig

Mae myfyriwr aeddfed wedi cyflawni anrhydedd dosbarth cyntaf ym Mhrifysgol Metropolitan Caerdydd ac wedi sicrhau cydnabyddiaeth genedlaethol wrth fod yn rownd derfynol 'Myfyriwr Israddedig y Flwyddyn'.

Gwnaeth Warren Abraham, 52, y penderfyniad i ailhyfforddi fel athro yn dilyn marwolaeth ei wraig yn ystod pandemig Covid-19, ar ôl gweithio fel cynorthwyydd addysgu o'r blaen. Yn benderfynol o adeiladu dyfodol newydd iddo'i hun a'i fab ifanc, cofrestrodd ym Met Caerdydd a safodd allan yn gyflym am ei gryfder academaidd a'i wydnwch.

Drwy gydol ei gyfnod ym Met Caerdydd, ymgollodd Warren ei hun mewn cyfleoedd i ddatblygu'n broffesiynol a chysylltu â chyfoedion, gan gynnwys mentora myfyrwyr iau. Fel myfyriwr aeddfed gyda phrofiad yn y byd go iawn, daeth yn fodel rôl cadarnhaol o fewn Ysgol Addysg a Pholisi Cymdeithasol Caerdydd - gan ennill y llysenw 'Dad' ymhlith ei garfan.

Cafodd ei gydnabod hefyd yng Ngwobrau Israddedig y Flwyddyn hynod gystadleuol, lle cafodd ei roi ar restr fer o dros 5,000 o ymgeiswyr ledled y DU yn y categori 'newidiwr gyrfa'. Cynhelir Gwobrau Israddedig y Flwyddyn gan Target Jobs ac maent yn gwobrwyo'r myfyrwyr gorau yn y DU.

Mae gwobr Newidiwr Gyrfa yn dathlu unigolion sydd wedi gwneud newidiadau sylweddol yn eu gyrfaoedd ac wedi dangos rhagoriaeth a phenderfyniad yn wyneb heriau. Fel rhan o'r digwyddiad i gyrraedd y rownd derfynol, cafodd Warren gyfle i gwrdd â myfyrwyreraill ar y rhestr fer a ffigurau cyhoeddus, gan gynnwys Jamie Laing o Made in Chelsea.

Fel rhan o'i flwyddyn olaf yn y Brifysgol, enillodd Warren radd dosbarth cyntaf am ei brosiect terfynol yn archwilio profiadau plant llaw chwith mewn addysg. Gan dynnu o'i arsylwadau a'i ddiddordebau personol ei hun, ymchwiliodd i'r heriau sy'n aml yn cael eu hanwybyddu y mae disgyblion llaw chwith yn eu hwynebu mewn amgylcheddau ystafell ddosbarth a gynlluniwyd yn bennaf ar gyfer dysgwyr llaw dde.

Mae Warren yn priodoli ei lwyddiant academaidd i gefnogaeth teulu ei ddiweddar wraig, sydd wedi chwarae rhan hanfodol yn ei helpu i fagu ei fab. Roedd eu cymorth gyda gofal plant a chyllid ffioedd dysgu yn rhoi'r amser a'r tawelwch meddwl iddo ganolbwyntio ar ei astudiaethau.

Gan ei fod bellach yn paratoi i ymuno â'r ystafell ddosbarth fel athro cymwysedig llawn, mae Warren yn cael ei ddenu'n arbennig at weithio gyda Chyfnod Allweddol 2 uwch, grwpiau blwyddyn y mae'n eu cael yn heriol ac yn werthfawr iawn. Esboniodd: “Gyda disgyblion hŷn - yn enwedig ym Mlynyddoedd 4, 5, a 6 - mae'n wir rhaid i chi ennill eu hymgysylltiad. Maen nhw'n dechrau ffurfio eu syniadau eu hunain a phrofi ffiniau, felly mae adeiladu'r cysylltiad hwnnw'n cymryd ymdrech, ond yr her honno yw'r hyn sy'n ei gwneud mor werth chweil. Rwy'n edrych ymlaen am y cyfle i wneud effaith barhaol mewn cyfnod mor hanfodol, wrth iddyn nhw baratoi ar gyfer y naid fawr i'r ysgol uwchradd. Mae'n gyfnod hollbwysig yn eu bywydau, ac rwyf am fod yn rhywun sy'n eu helpu i lywio drwyddo gyda hyder.”

Wrth groesi llwyfan Canolfan Mileniwm Cymru yn seremoni raddio Met Caerdydd ym mis Gorffennaf, mae Warren yn edrych ymlaen at gael ei fab a'i rieni-yng-nghyfraith yn ymuno ag ef ar gyfer y diwrnod mawr.