Datganiad Caethwasiaeth Fodern a Masnachu mewn Pobl Flynyddol Blwyddyn Ariannol 2024-2025

Cyflwyniad

Ym Mhrifysgol Metropolitan Caerdydd, rydym wedi ymrwymo i amddiffyn a pharchu hawliau dynol ac mae gennym ymagwedd dim goddefgarwch tuag at gaethwasiaeth a masnachu pobl yn ei holl ffurfiau. Gwneir y datganiad hwn gan Gadeirydd Bwrdd y Llywodraethwyr yn unol ag adran 54(1) Deddf Caethwasiaeth Fodern 2015 ac mae’n gweithredu fel datganiad caethwasiaeth a masnachu pobl Prifysgol Metropolitan Caerdydd ar gyfer y flwyddyn ariannol a ddaeth i ben 31 Gorffennaf 2025. Yn ogystal, mae'r datganiad hwn yn nodi ymrwymiadau'r Brifysgol mewn cysylltiad â chod ymarfer cyflogaeth foesegol mewn cadwyni cyflenwi Llywodraeth Cymru y mae'r Brifysgol wedi ymrwymo i’w gefnogi.

Mae Deddf Caethwasiaeth Fodern 2015 yn cydnabod bod caethwasiaeth fodern yn drosedd ac yn mynd yn groes i hawliau dynol sylfaenol. Mae gan hyn nifer o ffurfiau, gan gynnwys caethwasiaeth, caethwasanaeth, llafur dan orfodaeth a masnachu pobl, yr hyn sy’n gyffredin rhyngddynt oll yw dwyn rhyddid person gan berson arall er mwyn camfanteisio arno er budd personol neu fasnachol.

Strwythur y Sefydliad

Mae Prifysgol Metropolitan Caerdydd yn gorfforaeth addysg uwch a sefydlwyd o dan Ddeddf Diwygio Addysg 1988 (fel y'i diwygiwyd) ac yn elusen gofrestredig. Caiff Strwythur a Threfn Lywodraethu'r Brifysgol eu rheoli drwy Fwrdd Llywodraethwyr sy’n gyfrifol am gymeriad a chenhadaeth addysgol a goruchwylio gweithgareddau. Fe’i rheolir gan y Llywydd a’r Is-ganghellor gyda chefnogaeth uwch dîm gweithredol a Bwrdd Academaidd.

Mae'r Brifysgol yn gweithredu dau gampws addysgu, un campws preswyl a dau safle gwasanaethau busnes yn Ninas Caerdydd. Mae'r strwythur academaidd yn cynnwys pum Ysgol: Ysgol Chwaraeon a Gwyddorau Iechyd Caerdydd, Ysgol Rheoli Caerdydd, Ysgol Celf a Dylunio Caerdydd, Ysgol Technolegau Caerdydd ac Ysgol Addysg a Pholisi Cymdeithasol Caerdydd.

Mae gan y Brifysgol 1,481 o staff Cyfwerth ag Amser Llawn (ac eithrio staff achlysurol) a 12,088 o fyfyrwyr wedi'u lleoli yng Nghaerdydd a daw’r boblogaeth myfyrwyr o dros 115 o genhedloedd. Mae dros 20,000 o fyfyrwyr eraill wedi’u lleoli gyda phartneriaid byd-eang.

Mae gan y Brifysgol is-gwmni masnachu masnachol ac is-gwmni gweithredu tramor. Trosiant y Brifysgol ar gyfer y flwyddyn ariannol a gwmpesir gan yr adroddiad hwn oedd £149 miliwn.

Ein Cadwyni Cyflenwi

Mae'r Brifysgol yn ystyried bod ei chadwyni cyflenwi yn fyd-eang, gan gynnwys y rhai sy'n ymwneud yn uniongyrchol ac yn anuniongyrchol â chyflenwi nwyddau a gwasanaethau i'r Brifysgol; y rhai sy'n ymwneud â myfyrwyr sy'n astudio yng Nghaerdydd a gyda'i phartneriaid academaidd ledled y byd; a'r rhai sy'n ymwneud â'i weithwyr ei hun boed yng Nghaerdydd, mewn mannau eraill yn y DU neu dramor.

Cydnabyddir ei bod yn bosibl i achosion o gaethwasiaeth fodern ddigwydd mewn unrhyw gadwyn gyflenwi, gan gynnwys y rhai o fewn ein gweithrediadau ein hunain. Blaenoriaeth y Brifysgol yw craffu’n barhaus ar y cadwyni cyflenwi hynny sy'n cael eu hystyried yn risg uwch, ond bydd yn ymdrechu i ymchwilio i'w holl gadwyni cyflenwi pan fydd cyfleoedd rhesymol yn codi.

"Hyrwyddwr" caethwasiaeth fodern y Brifysgol yw Ysgrifennydd y Brifysgol a dylid adrodd pob pryder am gaethwasiaeth fodern i Ysgrifennydd y Brifysgol yn uniongyrchol neu drwy whistleblowing@cardiffmet.ac.uk.

Ein polisïau a'n harferion ar gyfer atal a lliniaru caethwasiaeth fodern, masnachu pobl a chyflogaeth foesegol

Mae'r Brifysgol wedi ymrwymo i sicrhau, lle bo hynny'n bosibl, nad oes caethwasiaeth fodern na masnachu pobl yn ei chadwyni cyflenwi nac mewn unrhyw ran o'i gweithrediadau ei hun a bod pawb a gyflogir yng ngweithgareddau'r Brifysgol yn cael eu trin yn deg ac yn briodol. Mae polisiau a gweithdrefnau'r Brifysgol yn dangos ei hymrwymiad i weithredu'n foesegol ac ag uniondeb yn ei holl berthnasoedd busnes.

Mae'r Brifysgol yn cydnabod bod angen i bolisïau a phrosesau effeithiol gael eu hyrwyddo’n glir, bod yn hawdd eu deall, yn hygyrch ac yn gyson ag arfer da. Mae'r holl bolisïau staff ar gael ar dudalennau mewnrwyd y Brifysgol Insite yn ogystal â'r Hyb Polisïau allanol; mae canllawiau ar gyfer cyflenwyr caffael ar gael ar wefan y Brifysgol; nodir cyfeiriad at Gydraddoldeb, Amrywiaeth a Chadwyni Cyflenwi Moesegol o fewn cytundebau cytundebol ac mae dolenni at bolisïau perthnasol ar gael i bartneriaid Addysg Trawswladol drwy'r llawlyfr Darpariaeth Gydweithredol, sy'n cael ei ddosbarthu i bartneriaid yn flynyddol.

Mae polisi Cadwyni Cyflenwi Moesegol wedi bod ar waith yn y Brifysgol ers 2011. Mae'r polisi hwn yn cael ei adolygu'n rheolaidd ac fe'i diweddarwyd eto yn 2024 i sicrhau ei fod yn parhau i adlewyrchu arferion da perthnasol. Mae gweithgaredd caffael y Brifysgol hefyd yn cefnogi’r egwyddorion a nodir yng Nghod Ymarfer Cyflogaeth Foesegol mewn Cadwyni Cyflenwi Llywodraeth Cymru a Datganiad Polisi Caffael Cymru.

Mae polisïau a gweithdrefnau'r Brifysgol yn cael eu hadolygu a'u diweddaru'n rheolaidd i sicrhau eu bod yn adlewyrchu Cod Ymarfer Cyflogaeth Foesegol mewn Cadwyni Cyflenwi Llywodraeth Cymru, gan ddangos ymrwymiad y Brifysgol i weithredu'n foesegol ac ag uniondeb yn ei holl berthnasoedd busnes, gan sicrhau nad yw caethwasiaeth fodern a masnachu pobl yn digwydd o fewn ei gweithluoedd yn y DU a rhyngwladol. Cyflogir y gweithlu rhyngwladol o fewn cyfreithiau perthnasol eu lleoliad ac mewn cytundeb â chynrychiolwyr penodedig.

Mae polisïau'r Brifysgol ar gael ar yr Hyb Polisïau sydd ar gael yn gyhoeddus i ymwelwyr a chyflenwyr. Mae polisïau a chanllawiau Gwasanaethau Pobl Gysylltiedig ar gael ar dudalennau mewnrwyd y Brifysgol: Insite.

Rydym yn gweithredu'r polisïau canlynol sy'n disgrifio ein dull o nodi risgiau caethwasiaeth fodern a'r camau i'w cymryd i atal caethwasiaeth a masnachu pobl yn ei gweithrediadau:

• Chwythu'r chwiban - Rydym yn annog ein holl staff, cwsmeriaid a phartneriaid busnes eraill i roi gwybod am unrhyw bryderon sy'n gysylltiedig â gweithgareddau uniongyrchol neu gadwyni cyflenwi ein sefydliad. Mae hyn yn cynnwys unrhyw amgylchiadau a allai arwain at risg uwch o gaethwasiaeth neu fasnachu pobl. Mae ein Polisi Chwythu'r Chwiban wedi'i ddiweddaru a'i adolygu i'w gwneud hi'n syml i weithwyr wneud datgeliadau heb ofn dial. Darperir canllawiau ar chwythu'r chwiban ar dudalen Insite ddynodedig hefyd.
• Cod Ymddygiad Gweithwyr - Mae ein cod yn ei gwneud yn glir i weithwyr beth yw’r camau gweithredu a’r ymddygiad a ddisgwylir ohonynt wrth gynrychioli’r Brifysgol. Rydym yn ymdrechu i gynnal y safonau uchaf o ymddygiad gweithwyr ac ymddygiad moesegol bob amser.
• Recriwtio / Gweithwyr Asiantaeth - Mae ein Polisi Recriwtio yn nodi sut mae'r Brifysgol yn recriwtio a chadw unigolion ac yn nodi hawliau gweithle yn y Brifysgol. Rydym yn drylwyr wrth wirio bod gan bob gweithiwr newydd yr hawl i weithio yn y DU. Rydym yn defnyddio asiantaethau cyflogaeth penodol ag enw da yn unig i ddod o hyd i lafur ac rydym bob amser yn gwirio arferion unrhyw asiantaeth newydd cyn derbyn gweithwyr o'r asiantaeth honno.
• Urddas a Pharch wrth Astudio a Gweithio - Mae ein Datganiad Urddas a Pharch wrth Astudio a Gweithio yn cynnwys pum egwyddor allweddol i helpu i ddatblygu amgylchedd dysgu, gweithio ac ymchwilio diogel, croesawgar a chynhwysol ar gyfer pob aelod o'n cymuned, yn yr holl leoedd a mannau yr ydym yn cynrychioli'r Brifysgol.
• Bwlio ac Aflonyddu – Trwy'r Polisi Aflonyddu a Bwlio, mae'r Brifysgol wedi ymrwymo i ddarparu amgylchedd gweithio a dysgu sy'n rhydd rhag unrhyw fath o aflonyddu, bwlio ac erledigaeth ac mae'n credu bod gan bob unigolyn yr hawl i gael ei drin ag urddas a pharch.
• Polisi Cyflog - Mae'r Brifysgol wedi'i hachredu gan y Sefydliad Cyflog Byw, sy'n ardystio bod yr holl staff yn cael eu talu cyflog byw gwirioneddol. Disgwylir i weithwyr dan gontract sy'n gweithio yn y Brifysgol gael y cyflog byw fel y'i diffinnir gan y Sefydliad Cyflog Byw ac mae'r Brifysgol yn gwerthuso ymagwedd cyflenwyr at Arferion Gwaith Teg, gan gynnwys y Cyflog Byw, yn unol â chanllawiau statudol.
• Cod Ymddygiad Cyflenwr / Caffael - Rydym wedi ymrwymo i sicrhau bod cyflenwyr yn cadw at y safonau moesegol uchaf. Mae'n ofynnol i gyflenwyr ddangos eu bod yn darparu amodau gwaith diogel lle bo angen, yn trin gweithwyr ag urddas, parch, ac yn gweithredu’n foesegol ac o fewn y gyfraith wrth ddefnyddio llafur. Rydym yn gweithio gyda chyflenwyr i sicrhau eu bod yn bodloni safonau'r Cod Ymarfer ac yn gwella amodau gwaith eu gweithwyr. Fodd bynnag, bydd achosion difrifol o fynd yn groes i’n cod ymddygiad cyflenwyr yn arwain at derfynu'r berthynas fusnes.

Mae gan y Brifysgol bolisïau hefyd sy'n cwmpasu materion fel Atal Llwgrwobrwyo, Atal Gwyngalchu Arian, Atal Twyll a Llygredd, Buddsoddi a Bancio Moesegol, a Chaffael Cynaliadwy.

Cadwyni Cyflenwi Addysg Trawswladol

O ran ei phartneriaid addysg trawswladol, mae'r Brifysgol yn cynnal asesiad diwydrwydd dyladwy trylwyr cyn dechrau unrhyw berthynas addysg drawswladol ac yn ailadrodd y broses hon o bryd i'w gilydd drwy gydol pob partneriaeth addysg drawswladol. Gan ddefnyddio adnoddau fel y Mynegai Rhyddid Dynol, mae'r broses hon yn tynnu sylw at bwysigrwydd arferion cyflogaeth moesegol sydd wedyn yn dod yn rhwymedigaeth gytundebol ar y partneriaid.

Mae'r Brifysgol wedi adolygu a diweddaru'r contractau a ddefnyddir gydag asiantau recriwtio tramor i sicrhau bod yr asiantau hyn yn cynnal y gweithgaredd y maent yn ei wneud ar ran y Brifysgol mewn modd moesegol a phriodol. Mae hyfforddi ein hasiantau yn rhan o'u proses sefydlu, rheoli contractau ac yn rhan o gynhadledd asiantau recriwtio'r Brifysgol.

Cadwyn Gyflenwi Fewnol y Brifysgol

Mae'r Brifysgol yn ymgymryd â chliriadau amrywiol wrth recriwtio a gwiriadau cyn cyflogi gan gynnwys 'hawl i weithio a gwiriadau’r gwasanaeth datgelu a gwahardd lle bo hynny'n briodol. Mae'r broses sefydlu staff yn cynnwys canllawiau ac adnoddau hyfforddi sy'n ymwneud â chydraddoldeb ac amrywiaeth sy'n cynnwys arwyddion o gaethwasiaeth fodern, yn ogystal â rhagfarn ddiarwybod.

Cadwyn Gyflenwi Allanol y Brifysgol

Er mwyn nodi a lliniaru'r risg, ymdrinnir â chaethwasiaeth fodern fel rhan allweddol o'r holl brosesau caffael, fel yr amlinellir isod.

• Mae'r tîm Caffael yn defnyddio gweithdrefnau proffilio nwyddau i fapio nwyddau’r gadwyn gyflenwi allanol i broffil risg, i nodi'r categorïau hynny sy’n risg uchel.
• Mae Deddf Caffael 2023 (a weithredwyd yn 2025) yn cyflwyno seiliau newydd ar gyfer gwahardd gorfodol ar gam dethol am droseddau caethwasiaeth fodern sy'n gofyn am wahardd ymgeiswyr o gaffael yn y sector cyhoeddus. Bydd caffael yn gwirio amodau cyfranogi cyflenwyr ar gyfer hyn ac yn gwirio Cofrestr Gwahardd Canolog newydd y Llywodraeth ac yn gwahardd cynigion lle mae trosedd wedi'i chyflawni.
• Mae Deddf Caffael 2023 hefyd yn cyflwyno seiliau newydd yn ôl disgresiwn ar gyfer gwahardd ymgeiswyr am gamymddwyn yn y farchnad lafur sy'n ymestyn i bersonau cysylltiedig. Bydd caffael yn adolygu’r holl seiliau yn ôl disgresiwn a bydd yn gwahardd cynigion, lle bo'n briodol gwneud hynny er mwyn gorfodi reoleiddiol caethwasiaeth fodern.
• Mae Deddf Caffael 2023 yn cyflwyno diffiniad newydd o Dendr Mwyaf Manteisiol (TMM) at ddibenion gwerthuso tendr; mae hwn yn newid cynnil o'r Tendr Mwyaf Economaidd Fanteisiol (TMEF). Mae hyn yn ein galluogi i roi pwysau cyfartal neu fwy i ffactorau ansoddol, cymdeithasol neu amgylcheddol eraill lle mae'n briodol ac yn berthnasol gwneud hynny yn natur y caffael. Ar gyfer meysydd gwariant categori risg uwch, bydd Caffael yn dyrannu pwysiad gwerthuso uwch lle mae caethwasiaeth fodern neu gyflogaeth foesegol yn cyflwyno fel risg uwch.
• Ar y cam dyfarnu, mae Caffael yn gofyn cwestiynau priodol ynglŷn â chwmni a pholisïau mewnol a threfn reoli cadwyn gyflenwi yr ymgeisydd.
• Mae caffael yn parhau i hyrwyddo Cod Ymarfer Llywodraeth Cymru ar Gyflogaeth Foesegol mewn Cadwyni Cyflenwi ac yn gofyn i'r holl gyflenwyr lofnodi a chefnogi'r Cod wrth gyfeirio ymgeiswyr i ddogfennau a fideos canllaw i'w cynorthwyo ac yn ei dro gysylltu â'n polisïau mewnol ein hunain.
• Rydym yn gofyn cwestiynau sy'n briodol ac yn berthnasol i'r categori risg caffael. Gofynnir cwestiwn Cod Ymarfer Arferion Gweithio Teg Llywodraeth Cymru fel mater o drefn a phan fo proffil y nwyddau yn risg uwch, rydym yn gofyn cwestiynau archwilio manylach ychwanegol i adlewyrchu natur a risg y caffael hwnnw.
• Mae ein telerau ac amodau contract yn ei gwneud yn ofynnol i gyflenwyr gymryd pob mesur rhesymol i sicrhau nad oes unrhyw fathau o gaethwasiaeth yn eu cadwyni cyflenwi uniongyrchol nac anuniongyrchol ac i ddarparu adroddiadau i'r Brifysgol ar y mesurau a'r canlyniadau yn hyn o beth.
• Mae datblygu cynaliadwy sy'n cynnwys caethwasiaeth fodern yn rhan allweddol o broses rheoli contractau’r Brifysgol ac mae cyfres o Ddangosyddion Perfformiad Allweddol wedi'i datblygu i'w defnyddio mewn meysydd categori risg uchel.
• Fel cyflogwr Cyflog Byw Gwirioneddol, rydym yn ymrwymo i sicrhau bod ein holl gontractwyr allanol allweddol y mae eu timau yn gweithio yn y Brifysgol yn cael eu talu'r Cyflog Byw Gwirioneddol.
• Mae'r Brifysgol yn aelod o Electronics Watch.

Ar hyn o bryd mae'r Brifysgol yn defnyddio proffil risg nwyddau yr Academi Caffael Addysg Uwch i ddilysu ei dadansoddiad risg ei hun, sydd wedi nodi'r nwyddau canlynol â risg uchel o gaethwasiaeth fodern:

• Recriwtio staff gan gontractwyr allweddol fel glanhau a diogelwch ac asiantaethau allanol
• Cyflenwadau swyddfa, yn enwedig dodrefn, nwyddau gwyn trydanol, tecstilau, offer chwaraeon
• Offer labordy a glanhau, ac offer meddygol
• Bwydydd a diodydd
• Dillad a dillad gwaith
• Offer digidol, gwasanaethau, cyfrifiadura a chlyweledol
• Adeiladu

Mae'r Brifysgol yn aelod o'r Consortiwm Pwrcasu Addysg Uwch, Cymru (HEPCW) a Chonsortia Caffael Prifysgolion y DU (UKUPC), ac ynghyd â phrifysgolion eraill yn parhau i weithio ar y cyd ar bob agwedd ar gaffael cyfrifol, sy'n cynnwys caethwasiaeth fodern ac yn cydnabod bod o fwy o fudd gwneud hynny. Rydym yn rhannu ystod gyffredin o gyflenwyr ar draws y sector ac yn mabwysiadu dull cyffredin o rannu offer, adnoddau ac allbynnau sy'n helpu i leihau dyblygu. Mae llawer o'n gwariant sy’n cael effaith yn cael ei sianelu drwy gytundebau cydweithredol ac mae'r holl gonsortia a fframweithiau AU wedi mabwysiadu Cod Ymddygiad Cadwyn Gyflenwi Sustain.

Rydym yn cyrchu ac yn defnyddio ystod o gytundebau consortia sector cyhoeddus eraill y DU, sy'n rhoi hyder ychwanegol bod caffael cyfrifol wedi'i ymgorffori'n llawn ym mhob cam o'r gadwyn gyflenwi gan sicrhau dull mwy safonol ar draws y sector cyhoeddus ar gyfer y gadwyn gyflenwi allanol.

Mae'r Brifysgol yn parhau i ddefnyddio offeryn cynllunio gweithredu gwerth cymdeithasol NETpositive Futures a drwyddedwyd gyntaf gan HEPCW ym mis Ionawr 2021. Mae'r offeryn yn cefnogi cyflenwyr i ddatblygu cynlluniau gweithredu cymdeithasol i gefnogi eu busnes ac yn eu helpu i ddeall y cyfraniad cadarnhaol y gall eu busnes ei wneud.

Mae'r offeryn wedi galluogi'r Brifysgol i gasglu data ar y camau gweithredu gwerth cymdeithasol sy'n cael eu cyflawni gan ein cyflenwyr. Mae ymrwymiad i ddefnyddio'r offeryn yn ofyniad cytundebol yn ein holl ddyfarniadau tendrau. Mae Caethwasiaeth Fodern yn ofyniad craidd o'r cynlluniau gweithredu hyn a darperir rhywfaint o ddata ar gaethwasiaeth fodern gan NETpositives isod.

• Cofrestrodd 505 o gyflenwyr ar yr offeryn.
• Mae 78% o’r cyflenwyr ar yr offeryn yn fusnesau bach a chanolig.
• Mae gan 83% o’r cyflenwyr safonau a pholisïau llafur moesegol ar waith.
• Mae 98% o'n cyflenwyr sydd wedi'u dosbarthu fel "risg uchel" yn ymwybodol o'u rhwymedigaethau mewn cysylltiad â chaethwasiaeth fodern.
• Ar gyfer y cyflenwyr hynny y mae eu trosiant yn fwy na £36 miliwn, mae 75% wedi cyhoeddi datganiad caethwasiaeth fodern.

Hyfforddiant ac Arweiniad

Mae datblygiad proffesiynol parhaus ar bob agwedd ar werth cymdeithasol, caffael cyfrifol a chaethwasiaeth fodern yn parhau i fod yn flaenoriaeth allweddol i'r tîm Caffael pan fydd canllawiau a deunydd newydd yn cael eu rhyddhau.

Mae'r Brifysgol wedi datblygu cyfres newydd o ddeunyddiau hyfforddi, dogfennaeth ganllawiau gan gynnwys fideos i staff ar y fewnrwyd, gan dynnu sylw at yr angen i bob aelod o staff fod yn ymwybodol o gaethwasiaeth fodern a'r ffurfiau niferus y gall gyflwyno. Er mwyn ategu'r deunydd hyfforddi hwn, cafodd cynnwys y cwrs presennol sy'n cynnwys hyfforddiant ymwybyddiaeth caethwasiaeth fodern ar gyfer staff newydd ei ddiwygio a'i ddiweddaru hefyd.

Fel rhan o gynhadledd asiantau flynyddol y Brifysgol, mae canllawiau caethwasiaeth fodern yn cael eu hatgyfnerthu'n gyson gan y Tîm Recriwtio Myfyrwyr Rhyngwladol a'u hatgyfnerthu yn ystod ymweliadau â swyddfeydd asiantau.

Gall myfyrwyr gael mynediad at gymorth i lywio gwybodaeth allweddol sy'n ymwneud â hawliau a chyfrifoldebau cyflogaeth gan y Tîm Gyrfaoedd. Mae hyn yn cynnwys canllawiau a chyfeirio i ddeddfwriaeth a gwasanaethau cymorth allanol proffesiynol fel Cyngor ar Bopeth. Mae'r Tîm Gyrfaoedd yn ceisio ymgorffori'r wybodaeth hon ymhellach yn Llunio Eich Dyfodol, fframwaith sydd ar gael i bob myfyriwr sy'n darparu gwybodaeth i fyfyrwyr sy'n ymwneud â chwilio am swydd a rheoli gyrfa. Yn ogystal, mae'r Tîm Ymgysylltu Byd-eang yn darparu cymorth ychwanegol i fyfyrwyr rhyngwladol mewn cysylltiad â'r hyn i'w ddisgwyl gan gyflogwyr y DU a hawliau cyflogaeth allweddol y DU. Mae adnoddau ychwanegol ar gael ar fewnrwyd y myfyrwyr ac maent wedi'u hintegreiddio mewn gweithdai a chyflwyniadau sy'n canolbwyntio ar baratoi at gyflogaeth.

Yn ystod cyfnod yr adroddiad hwn

Yn ogystal â'r deunyddiau hyfforddi a'r canllawiau newydd, mae'r Brifysgol wedi ymgymryd â'r camau cadarnhaol canlynol:

• Parhau i ddatblygu ein dogfennaeth datblygu cynaliadwy ar gyfer darpar ymgeiswyr gan gynnwys gofynion ar gyfer masnach deg neu gotwm o ffynonellau moesegol fel rhan o ofynion tendro dillad chwaraeon.
• Mae Cod Ymddygiad Cadwyn Gyflenwi Sustain wedi'i gyflwyno i’r holl gaffael. Mae'r rhain yn gyfres o ganllawiau cynaliadwyedd ar gyfer cyflenwyr sydd â'r nod o wella lles amgylcheddol, cymdeithasol ac economaidd. Mae'n ei gwneud yn ofynnol i gyflenwyr gynnal arferion llafur moesegol, diogelu'r amgylchedd, a gweithredu ag uniondeb yn eu trafodaethau busnes, gan gwmpasu meysydd fel dim llafur gorfodol, cyflogau teg, amodau gwaith diogel, a diogelu'r amgylchedd. 
• Adolygu a diweddaru ein polisïau a'n gweithdrefnau i weithredu Nodiadau Polisi Caffael diweddaraf Llywodraeth Cymru.
• Adolygu a diweddaru polisïau, prosesau a deunyddiau canllawiau caffael i adlewyrchu gofynion newydd Deddf Caffael 2023 a Rheoliadau Caffael (Cymru) 2024 sydd bellach yn cynnwys Polisi Caffael Cymru.
• Adolygu, diweddaru a diwygio'r dadansoddiad risg codio nwyddau presennol ar gyfer pob categori risg caffael cyfrifol gan gynnwys Caethwasiaeth Fodern
• Adolygu cyfrifon banc gweithwyr i dynnu sylw at gyfrifon dyblyg ar gyfer staff nad ydynt yn gysylltiedig a rhifau a chyfeiriadau cyfrifon banc dilyniannol.

Blaenoriaethau ar gyfer y flwyddyn i ddod

• Parhau i weithredu themâu ychwanegol o Themâu, Canlyniadau a Mesurau (ThCM) Cenedlaethol Cymru yn ein caffael, fel y bo'n briodol.
• Datblygu a / neu gyfeirio deunyddiau hyfforddi ar gyfer y boblogaeth myfyrwyr.
• Mynd i'r afael ag unrhyw ofynion newydd o ran caffael cyfrifol sydd eto i'w gweithredu o dan Ddeddf Caffael 2023 a Rheoliadau Caffael (Cymru) 2024.
• Parhau i weithio gyda'n sylfaen gyflenwi ac annog mwy o gyflenwyr i ymgysylltu â'r offeryn NETpositive fel rhan o'r cam dyfarnu contract a sicrhau ein bod yn cymryd camau dilynol ar gynllunio gweithredu i sicrhau cynnydd o flwyddyn i flwyddyn.
• Parhau i fonitro manylion banc gweithwyr ar gyfer cyfrifon a chyfeiriadau dyblyg a dilyniannol ac ychwanegu at amlder y gwiriadau hyn, bob chwarter.
• Parhau i atgyfnerthu hyfforddiant i asiantau rhyngwladol yn y gynhadledd partneriaid asiantau nesaf.

Llofnodwyd gan Gadeirydd Bwrdd y Llywodraethwyr

John Taylor CBE
Cadeirydd Bwrdd y Llywodraethwyr

Cymeradwywyd gan y Pwyllgor Archwilio ar ran Bwrdd y Llywodraethwyr ar 20 Ionawr 2026.