Aelod o staff Met Caerdydd wedi'i gydnabod â gwobr genedlaethol Brechu'n Achub Bywydau

Aelod o staff Met Caerdydd wedi'i gydnabod â gwobr genedlaethol Brechu'n Achub Bywydau

Mae Prifysgol Metropolitan Caerdydd yn dathlu cydnabyddiaeth genedlaethol un o'i haelodau staff am ei chyfraniad rhagorol at wasanaethau brechu myfyrwyr ledled Cymru.

Mae Hannah Kinasz, Cydlynydd Cymorth Busnes yn Ysgolion Chwaraeon a Gwyddorau Iechyd ac Addysg a Pholisi Cymdeithasol Caerdydd, wedi cael ei henwi'n enillydd Gwobr Pencampwr Mae Brechu'n Achub Bywydau (VSL) 2026 gan Iechyd Cyhoeddus Cymru.

Mae'r wobr yn cydnabod unigolion sy'n gwneud argraff eithriadol wrth gynllunio neu ddarparu gwasanaethau brechu. Derbyniodd Hannah ei gwobr yng Nghynhadledd Imiwneiddio Cymru 2026.

Dywedodd Hannah: "Mae'n anrhydedd i mi gael fy enwebu a derbyn Gwobr Pencampwr Mae Brechu yn Achub Bywydau Iechyd Cyhoeddus Cymru 2026.

“Mae'n hynod werthfawr gweld y gwaith sy'n cefnogi gofynion brechu myfyrwyr ar gyfer rhaglen a ariennir gan y GIG yn cael ei gydnabod ar lefel genedlaethol.

“I Brifysgol Metropolitan Caerdydd, mae hyn yn adlewyrchu ein hymrwymiad i ddiogelu iechyd a lles myfyrwyr, cleifion a'r gymuned gofal iechyd ehangach ac yn dangos beth y gellir ei gyflawni pan fydd timau'n cydweithio i wneud gwasanaethau iechyd hanfodol yn hygyrch ac yn effeithiol."

Mae Hannah yn goruchwylio prosesau iechyd galwedigaethol a brechu ar gyfer myfyrwyr ar raglenni a gomisiynir gan iechyd, lle mae imiwneiddio yn ofyniad cyn ymgymryd â lleoliadau clinigol.

Gan gydnabod yr heriau y mae llawer o fyfyrwyr yn eu hwynebu wrth wneud penderfyniadau iechyd yn annibynnol am y tro cyntaf, arweiniodd fenter a oedd yn seiliedig ar ddata i wella ymgysylltiad a mynediad at wasanaethau brechu.

Drwy ddadansoddi data clinigol, nododd Hannah gyfradd uchel o apwyntiadau a fethwyd, a oedd yn peri risg o ohirio lleoliadau a chynyddu pwysau gweinyddol. Mewn ymateb, cydweithiodd â chyfarwyddwyr rhaglenni a darparwyr iechyd galwedigaethol i nodi rhwystrau a gweithredu atebion wedi'u targedu.

Roedd ei dull yn cynnwys cyflwyno sesiynau addysg dan arweiniad iechyd galwedigaethol yn ystod y cyfnod sefydlu, gan roi mynediad cynnar i fyfyrwyr at wybodaeth glir, sy'n seiliedig ar dystiolaeth, ac amgylchedd cefnogol i ofyn cwestiynau ynddo. Trefnodd glinigau brechu ochr yn ochr â sesiynau addysgu presennol hefyd, gan eu gwneud yn fwy cyfleus i fyfyrwyr jyglo ymrwymiadau academaidd a phersonol.

Sicrhaodd Hannah fod yr holl gyfathrebiadau'n parhau i fod yn gywir ac yn cyd-fynd â chanllawiau cenedlaethol, gan gynnwys diweddariadau i brotocolau brechu Hepatitis B, gan gynnal cydweithrediad agos â thimau derbyn a chlinigol.

Mae'r mentrau hyn wedi arwain at ostyngiad sylweddol mewn apwyntiadau a fethwyd, gyda chyfraddau 'heb fynychu' yn gostwng o 19.92% i 10.82% dros 12 mis. Mae'r gwelliannau wedi symleiddio lleoliadau, lleihau oedi a gwneud gwasanaethau brechu yn fwy hygyrch a chyfartal i fyfyrwyr.

Drwy ei dull cydweithredol, sy'n canolbwyntio ar fyfyrwyr, mae Hannah wedi gwneud effaith fesuradwy, gan gefnogi myfyrwyr i wneud penderfyniadau iechyd gwybodus wrth gryfhau'r ddarpariaeth brechiadau ar draws cymuned Met Caerdydd.

Mae'r gydnabyddiaeth hon yn tynnu sylw at effaith dulliau cydweithredol, sy'n seiliedig ar dystiolaeth, o wella nifer y bobl sy'n cymryd brechiadau a lleihau anghydraddoldebau ar draws poblogaethau myfyrwyr amrywiol.