Agweddau Eraill Cynaliadwyedd

Cemegau a Sylweddau Peryglus

Mae Cynghorydd Iechyd a Diogelwch Met Caerdydd yn cydweithio a Thechnegwyr Labordy i fonitro sut mae sylweddau peryglus yn cael eu storio, eu trin a'u defnyddio, gan flaenoriaethu atal gollyngiadau ac allyriadau a allai arwain at ddifrod amgylcheddol. Rhaid i ysgolion reoli pob agwedd ar iechyd a diogelwch yn eu hardaloedd, gan gynnwys rheoli sylweddau peryglus a chadw cofnod o'r holl gemegau. Mae sylweddau peryglus yn cael eu storio mewn storfeydd diogel ac mae aelodau staff perthnasol yn cael eu hyfforddi i drin, i ddefnyddio ac i waredu'r rhain yn ddiogel.

Ystâd Gynaliadwy

Mae Prifysgol Metropolitan Caerdydd wedi ymrwymo i reoli a gwella agweddau amgylcheddol gweithrediadau'r ystâd drwy gynnal asesiadau risg i nodi bregusrwydd ac adeiladu gwydnwch yn erbyn effeithiau newid hinsawdd, yn ogystal â blaenoriaethu dylunio cynaliadwy, arferion adeiladu, ac ailddefnyddio deunyddiau ar gyfer datblygiadau, adnewyddiadau a gwaith cynnal a chadw ar yr ystâd. Mae'r Brifysgol hefyd yn cynnal archwiliadau allanol i sicrhau bod ein safleoedd yn cadw ymddangosiad da, ac yn ymgysylltu a Chyngor Caerdydd ar arolygon ecolegol.

Allyriadau a Chartffrydiau

Mae Allyriadau ac Elifiant yn cael eu rheoli gan dîm Amgylchedd ac Ystadau Met Caerdydd. Maen nhw'n goruchwylio rhyddhau nwyon tŷ gwydr, elifion nwyol, elifion trwy garthffosiaeth, a Legionella. Mae'r Brifysgol yn cynnal strategaeth gynnal a chadw cadarn yn unol â rhwymedigaethau statudol, tra bod ysgolion y Brifysgol yn cynnal asesiadau risg annibynnol ac yn sicrhau eu bod yn cael cyn lleied o effaith ag sy'n bosibl ar yr amgylchedd lleol.

Seilwaith Digidol Cynaliadwy

Mae technolegau digidol yn chwarae rhan hanfodol wrth gefnogi dysgu, addysgu, ymchwil a gwasanaethau proffesiynol ar draws Prifysgol Metropolitan Caerdydd. Wrth i'n defnydd o wasanaethau digidol barhau i dyfu, rydym yn cydnabod pwysigrwydd lleihau eu heffaith amgylcheddol wrth gynnal technoleg ddiogel, ddibynadwy a pherfformiad uchel.

Mae Met Caerdydd wedi ymrwymo i wella cynaliadwyedd ei seilwaith digidol trwy dechnoleg sy'n effeithlon o ran ynni, caffael cyfrifol, rheoli offer TG yn gynaliadwy, a hyrwyddo arferion digidol cyfrifol, gan gynnwys defnydd cyfrifol o ddeallusrwydd artiffisial. Mae'r ddogfen hon yn amlinellu dull y Brifysgol o seilwaith digidol cynaliadwy ac yn tynnu sylw at rai o'r canllawiau a'r mentrau sy'n cefnogi'r ymrwymiad hwn.