Canolfan ymchwil newydd i helpu technolegau newydd i wneud gwahaniaeth mewn ystafelloedd dosbarth a theatrau darlithio

Mae Met Caerdydd wedi lansio'r Ganolfan Ymchwil Ryngwladol mewn Technolegau Rhyngweithiol ar gyfer Addysgu a Dysgu (CIRITTL) - canolfan ar gyfer ymchwil, cydweithio ac arloesi yn y ffordd y gall technoleg wella addysgu a dysgu.

Mae'r CIRITTL yn adeiladu ar brosiectau cydweithredol Met Caerdydd, gan gynnwys Erasmus+ a Chydweithrediad Cymru ar gyfer Dylunio Dysgu (WCLD).

Mae CIRITTL hefyd yn adeiladu ar bartneriaethau rhyngwladol presennol ac Astudiaeth Achos Effaith Fframwaith Rhagoriaeth Ymchwil 2021 'Gwella defnydd addysgwyr o dechnoleg mewn addysgu ieithoedd ar draws Ewrop ac Ewrasia' i ddatblygu dealltwriaeth o'r hyn sy'n gweithio gyda thechnoleg mewn addysgu a dysgu.

Mae Nick Young yn Uwch Ddarlithydd mewn Astudiaethau Addysg Gynradd ym Mhrifysgol Metropolitan Caerdydd a bydd yn arwain ar CIRITTL. Dywedodd Nick: “Nod hirdymor CIRITTL yw adeiladu sylfaen dystiolaeth gref ac ymarferol sy’n cefnogi addysgwyr, sefydliadau a llunwyr polisi i wneud penderfyniadau gwybodus am dechnoleg mewn dysgu. Drwy gydweithio ledled Cymru ac yn rhyngwladol, bydd y ganolfan yn helpu i sicrhau bod arloesedd yn arwain at welliannau ystyrlon, cynhwysol a chynaliadwy mewn addysg.”

Yn y digwyddiad lansio diweddar ar gyfer CIRITTL, cynhaliwyd cyfres o sgyrsiau blasu ymchwil yn tynnu sylw at amrywiaeth a chreadigrwydd prosiectau cyfredol, gan gynnwys y canlynol:

• Dr Julian Ayres (Prifysgol Wrecsam) - 'O'r Llechen i'r Sgrin: Adnoddau treftadaeth rhyngweithiol yn adeiladu Dysgu Cynradd drwy 360 ac offer sgrin werdd’
• Yr Athro Jeff Lewis (Prifysgol Metropolitan Caerdydd) - SpaceFlow: Cymorth Iechyd Meddwl Trochol
• Yr Athro Sarah Curran (Prifysgol Metropolitan Caerdydd) - Olrhain y Syllfa Glinigol: Sut mae Efelychu Clwyfau Traed yn Llunio Dysgu ac Addysgu
• Dr Sammy Chapman (Prifysgol Metropolitan Caerdydd) - Ein Hysgol Drwy Ein Llygaid Ni: Defnyddio Lluniau Rhyngweithiol 360° mewn Lleoliad Ysgol Arbennig.

Mae'r prosiectau hyn yn dangos ymrwymiad CIRITTL i archwilio technolegau rhyngweithiol ar draws cyd-destunau, o realiti rhithwir trochol ar gyfer lles i olrhain llygaid mewn addysg glinigol a phrofiadau 360° dan arweiniad dysgwyr mewn ysgolion.

“Mae’r ganolfan hon yn ymwneud â sicrhau bod technolegau newydd yn gwneud gwahaniaeth gwirioneddol mewn ystafelloedd dosbarth, theatrau darlithio a mannau dysgu go iawn. Drwy seilio arloesedd mewn ymchwil a chydweithio, bydd CIRITTL yn helpu addysgwyr i deimlo'n fwy hyderus, galluog a gwybodus yn y ffordd maent yn defnyddio technoleg i gefnogi dysgu,” ychwanegodd Nick.

Mae CIRITTL bellach yn recriwtio cynrychiolwyr o bob un o bum Ysgol Prifysgol Metropolitan Caerdydd lle bydd mewnbwn yn hanfodol wrth lunio cyfeiriad y ganolfan a sicrhau ei bod wedi'i chysylltu ar draws pob maes.

I ddysgu mwy am CIRITTL, gan gynnwys cenhadaeth, amcanion, grŵp arweinyddiaeth a chyfarfodydd y ganolfan, ewch i wefan y Ganolfan Ymchwil Ryngwladol mewn Technolegau Rhyngweithiol ar gyfer Addysgu a Dysgu.