Dathlu Prifysgol Chwaraeon Cymru

Dathlodd Met Caerdydd ei hymddangosiad fel Prifysgol Chwaraeon Cymru mewn digwyddiad ar gampws Cyncoed a oedd hefyd yn nodi cyhoeddiad tîm Cymru ar gyfer Gemau'r Gymanwlad 2026 yng Nglasgow.

Dywedodd yr Athro Rachael Langford, Is-Ganghellor, wrth y gynulleidfa:

"Mae lansio Met Caerdydd fel Prifysgol Chwaraeon Cymru yn gyfle cyffrous i edrych ymlaen i'r dyfodol tra hefyd yn cydnabod bron i 70 mlynedd o ymrwymiad i ragoriaeth mewn perfformiad chwaraeon a datblygu chwaraeon yng Nghymru. Fel Prifysgol Chwaraeon Cymru, rydym yn gwneud mwy na dim ond cefnogi rhagoriaeth mewn perfformiad ar y lefel uchaf; rydym yn sylfaenol i ddatblygu'r dalent, y syniadau a'r cyfleoedd sy'n siapio dyfodol chwaraeon yng Nghymru a thu hwnt."

Wrth wraidd gweledigaeth Met Caerdydd mae cydweithio, megis y rhaglen arweinyddiaeth arobryn, a ddatblygwyd gyda Thîm Cymru a'i chyflwyno drwy'r Ysgol Chwaraeon a Gwyddorau Iechyd, fydd yn grymuso'r genhedlaeth nesaf o arweinwyr, yn enwedig menywod mewn chwaraeon, gan eu harfogi â'r sgiliau, yr hyder a'r profiad i gael effaith. Mae mwy na 50 o fyfyrwyr eisoes wedi cyfrannu'n uniongyrchol trwy leoliadau, interniaethau a phrosiectau cydweithredol. Mae'r bartneriaeth yn rhychwantu popeth o ddatblygu arweinyddiaeth i gefnogi perfformiad ac mae wedi cael ei chydnabod yn rhyngwladol.

Mae dull Met Caerdydd yn unigryw: nid yw myfyrwyr yn dysgu am chwaraeon yn unig, maen nhw'n ei lunio’n weithredol.

• Chwaraeodd myfyrwyr dylunio ran allweddol wrth greu cit swyddogol Tîm Cymru.
• Mae myfyrwyr technoleg a pherfformiad wedi cefnogi athletwyr trwy waith dadansoddi a pharatoi arloesol.
• Mae eraill wedi sicrhau interniaethau ar draws Tîm Cymru a mudiad ehangach y Gymanwlad.

Mae gan Met Caerdydd draddodiad hir o gefnogi perfformwyr o'r radd flaenaf ac mae'n falch o’r garfan gref o fyfyrwyr presennol a chyn-fyfyrwyr, staff a chysylltiadau, hyfforddwyr a thimau cymorth sy'n cynrychioli Tîm Cymru a gwledydd eraill yng Ngemau'r Gymanwlad 2026 yng Nglasgow.

Trwy fentrau fel rhaglenni ymgysylltu ag ysgolion, hyfforddi allgymorth, a phartneriaethau cymunedol, mae Met Caerdydd hefyd yn helpu i ysbrydoli'r genhedlaeth nesaf, gan greu llwybrau i’r byd chwaraeon i bobl ifanc.

Meddai'r Athro Langford: "Mae'r rôl rydyn ni'n ei chwarae yn ecosystem chwaraeon Cymru yn ganolog i lwyddiant ar y cae, y cwrt, y trac, yn y pwll nofio ac ar y dŵr, ond rydym hefyd yn arwain y gwaith o greu system integredig lle gall rhaglenni cenedlaethol, timau elitaidd, myfyrwyr, a chymunedau gysylltu a ffynnu gyda'i gilydd, system sy'n cysylltu chwaraeon perfformiad ag addysg,  ymchwil, a gweithgareddau ac ymgysylltiad cymunedol. Ein hymrwymiad fel Prifysgol Chwaraeon Cymru yw cydnabod a datblygu'r dull hwn sy'n gysylltiedig â'r system gyfan, yn lleol ac yn fyd-eang er budd Cymru a'r byd ehangach nawr ac ymhell i'r dyfodol. Ar ran pawb ym Met Caerdydd, hoffwn ddymuno pob llwyddiant i'r holl athletwyr, hyfforddwyr a staff ehangach Tîm Cymru yng Ngemau'r Gymanwlad Glasgow 2026."

Talodd Helen Phillips, Prif Swyddog Gweithredol Tîm Cymru, deyrnged i'r bartneriaeth gref gyda Met Caerdydd: "Rwyf am fanteisio ar y cyfle hwn i ddathlu'r bartneriaeth ragorol sydd gennym, ac ymrwymiad Met Caerdydd i'n syniadau a'n gweledigaeth."

Siaradodd panel yn cynnwys myfyriwr presennol Met Caerdydd, Morgan Griffiths, Suzy Drane, uwch ddarlithydd mewn Datblygu Chwaraeon, cyn-fyfyrwyr Sue Butler (Pennaeth Chwaraeon S4C) a Caroline Spanton (Prif Swyddog Gweithredol Beicio Cymru), ac Aled Lewis. Pennaeth Addysg Gorfforol yn Ysgol Edern, dan gadeiryddiaeth un o raddedigion y cyfryngau Gabriella Dukes am ddylanwad cadarnhaol chwaraeon Met Caerdydd ar unigolion a'r gymuned ehangach.