Met Caerdydd yn cyflawni'r canlyniad uchaf erioed i Wobr Prifysgol Masnach Deg

Mae Prifysgol Metropolitan Caerdydd wedi cyflawni ei sgôr Gwobr Prifysgol Masnach Deg uchaf erioed, gan ennill Gwobr Prifysgol Masnach Deg dwy seren i gydnabod ei hymrwymiad i gaffael moesegol, cynaliadwyedd a chyfiawnder cymdeithasol.

Cyflawnodd Met Caerdydd 385 pwynt ar draws 41 o feini prawf asesu, gan ddangos ymrwymiad y Brifysgol gyfan i greu effaith gymdeithasol ac amgylcheddol gadarnhaol.

Mae'r wobr yn adlewyrchu gweithredu cadarnhaol ar draws y Brifysgol, o gynyddu argaeledd cynhyrchion Masnach Deg a chryfhau arferion caffael moesegol i ymgorffori Masnach Deg a defnydd cyfrifol o fewn y cwricwlwm. Mae myfyrwyr hefyd wedi cymryd rhan mewn prosiectau, ymgyrchoedd a chyfleoedd gwirfoddoli sy'n canolbwyntio ar Fasnach Deg sy'n cysylltu heriau byd-eang â dysgu yn y byd go iawn.

Mae'r cyflawniad yn gosod Met Caerdydd ymhlith grŵp dethol o brifysgolion y DU a gydnabyddir gan y Sefydliad Masnach Deg a SOS-UK am ymgorffori egwyddorion Masnach Deg ar draws addysgu, ymchwil, caffael ac ymgysylltu â myfyrwyr. Ymhlith y prifysgolion eraill yng ngharfan Gwobr Prifysgolion Masnach Deg 2024-26 roedd UCL, Birmingham, Leeds, St Andrews, Caerdydd a Chaerwysg.

Mae'r Brifysgol wedi cynnal achrediad Masnach Deg ers 2007, ond mae'r canlyniad diweddaraf hwn yn nodi ei pherfformiad cryfaf hyd yn hyn.

Un fenter amlwg oedd y digwyddiad te prynhawn ac adrodd straeon Masnach Deg, a gyflwynwyd drwy gydweithrediad rhwng timau Cynaliadwyedd, Arlwyo ac Argraffu Met Caerdydd, Masnach Deg Cymru a Masnach Deg Pontypridd. Daeth y digwyddiad â staff, myfyrwyr a phartneriaid cymunedol ynghyd i archwilio effaith Masnach Deg a dewisiadau defnyddwyr moesegol yn y byd go iawn.

Dywedodd Arweinydd Gweithredu Hinsawdd Met Caerdydd, Dr David Clubb: "Mae'r wobr hon yn hynod ystyrlon i'r tîm Gweithredu Hinsawdd. Trwy ein gwaith, rydym wedi dod i ddeall yn well yr effaith wirioneddol y mae Masnach Deg yn ei chael ar gynhyrchwyr bach ledled y byd, gan gefnogi eu hymdrechion i aros fel ceidwaid y tir a helpu i ddiogelu urddas a safonau byw mewn ardaloedd gwledig.

"Mae cyflawni'r wobr dwy seren yn dangos ymrwymiad ac ymdrech pawb sy'n ymwneud â'r broses achredu ac yn adlewyrchu'n gadarnhaol uchelgais y Brifysgol i weithredu'n gyfrifol ar raddfa fyd-eang ar draws popeth y mae'n ei wneud."

I fyfyrwyr, mae'r manteision yn ymestyn y tu hwnt i'r ystafell ddosbarth.

Dywedodd y myfyriwr MSc Rheoli Busnes Rhyngwladol, Ferdous Woahid Raz: "Mae gwirfoddoli ar gyfer mentrau Masnach Deg y Brifysgol wedi bod yn brofiad hynod werth chweil. Mae wedi caniatáu imi ddatblygu sgiliau newydd, dyfnhau fy nealltwriaeth o foeseg a chynaliadwyedd byd-eang ac ennill profiad gwerthfawr a fydd yn cefnogi fy ngyrfa yn y dyfodol. Rwy'n falch o fod yn rhan o gymuned brifysgol sy'n hyrwyddo'r gwerthoedd hyn mewn gwirionedd."

Gyda'r asesiad nesaf i fod yn 2028, mae Met Caerdydd eisoes yn edrych ymlaen at adeiladu ar y llwyddiant hwn a chreu hyd yn oed mwy o gyfleoedd i staff a myfyrwyr hyrwyddo dewisiadau moesegol a chynaliadwy.