Prifysgol Metropolitan Caerdydd a Chlwb Rygbi’r Dreigiau’n ymuno i hybu addysg, ymchwil a datblygiad chwaraewyr

Mae Prifysgol Metropolitan Caerdydd a Chlwb Rygbi’r Dreigiau wedi cyhoeddi partneriaeth ffurfiol a fydd yn cryfhau’r cysylltiadau rhwng addysg uwch a rygbi proffesiynol, gan greu cyfleoedd newydd i fyfyrwyr, hyfforddwyr, chwaraewyr a staff wrth gefnogi datblygiad y gêm yn y dyfodol yng Nghymru.

Bydd y bartneriaeth yn dwyn ynghyd arbenigedd blaenllaw Met Caerdydd mewn addysg, ymchwil a datblygiad proffesiynol â phrofiad Clwb Rygbi’r Dreigiau mewn chwaraeon elitaidd i greu cyfleoedd ymarferol ar gyfer dysgu, arloesi a datblygu gyrfa.

Bydd y cydweithrediad yn canolbwyntio ar feysydd gan gynnwys addysg hyfforddwyr, ymchwil gymhwysol, datblygiad proffesiynol, llwybrau talent a lleoliadau myfyrwyr. Drwy gysylltu gwybodaeth academaidd â phrofiad yn y byd go iawn, nod y bartneriaeth yw helpu myfyrwyr i gael amlygiad gwerthfawr yn y diwydiant, cefnogi datblygiad hyfforddwyr ac ymarferwyr, a chyfrannu at ddatblygiadau ym mherfformiad a lles chwaraewyr. 

Bydd myfyrwyr yn elwa o gyfleoedd i weithio o fewn amgylchedd chwaraeon proffesiynol, gan eu helpu i feithrin sgiliau, profiad a chysylltiadau â'r diwydiant. Ar yr un pryd, bydd Clwb Rygbi’r Dreigiau yn gallu defnyddio arbenigedd academaidd a galluoedd ymchwil Met Caerdydd i helpu i fynd i’r afael â heriau o ran datblygu chwaraewyr, perfformiad ac arfer sefydliadol.

Disgwylir hefyd i'r bartneriaeth gefnogi ymgysylltiad cymunedol ehangach a chreu llwybrau cryfach rhwng addysg, cyflogaeth a chwaraeon elitaidd, gan helpu i ddatblygu'r genhedlaeth nesaf o dalent rygbi a gweithwyr proffesiynol chwaraeon ledled Cymru. 

Dywedodd yr Athro Rachael Langford, Is-Ganghellor ym Mhrifysgol Metropolitan Caerdydd:

“Fel Prifysgol Chwaraeon Cymru, rydym yn falch iawn o ffurfioli ein partneriaeth â Chlwb Rygbi'r Dreigiau heddiw. Mae Clwb Rygbi’r Dreigiau yn sefydliad sydd â threftadaeth rygbi balch, gwreiddiau dwfn ar draws de-ddwyrain Cymru ac ymrwymiad eithriadol i'r cymunedau y mae'n eu gwasanaethu.

“Mae'r bartneriaeth ffurfiol hon yn cyfuno’n dau sefydliad at ei gilydd drwy ein hymrwymiad cyffredin i ddatblygu'r gêm rygbi ac i addysg, cynhwysiant a chyfleoedd. Trwy gyfuno arbenigedd Prifysgol Metropolitan Caerdydd mewn addysg chwaraeon, ymchwil ac ymarfer proffesiynol gydag ymrwymiad Clwb Rygbi'r Dreigiau i ragoriaeth a phrofiad o ddatblygu'r gêm broffesiynol, byddwn yn creu cyfleoedd newydd i fyfyrwyr, hyfforddwyr, staff cymorth ac ymarferwyr, gan gryfhau dyfodol rygbi yng Nghymru."

Dywedodd Rhys Blumberg, Prif Swyddog Gweithredol Clwb Rygbi’r Dreigiau:

“Rydym yn falch o sefydlu’r bartneriaeth ffurfiol hon gyda Phrifysgol Metropolitan Caerdydd. Mae addysg, dysgu parhaus a datblygiad pobl yn hanfodol i lwyddiant hirdymor rygbi proffesiynol, ar y cae ac oddi arno.

“Bydd gweithio gyda Met Caerdydd yn ein galluogi i archwilio cyfleoedd newydd mewn addysg hyfforddwyr, ymchwil gymhwysol, lleoliadau myfyrwyr a datblygu chwaraewyr, gan gryfhau ein cysylltiadau â’r genhedlaeth nesaf o dalent. Rydym yn arbennig o gyffrous am y potensial i rannu gwybodaeth, creu llwybrau datblygu ystyrlon a gweithio gyda'n gilydd ar fentrau sy'n fuddiol i'n hamgylchedd perfformio a'r gymuned ehangach.”