Rhaglen Ymchwil Deallusrwydd Artiffisial y Brifysgol wedi’i Hamlygu mewn Gwerthusiad Cenedlaethol

Mae rôl Met Caerdydd mewn rhaglen ymchwil deallusrwydd artiffisial genedlaethol wedi’i chydnabod mewn gwerthusiad annibynnol sy’n tynnu sylw at effaith gadarnhaol lleoliadau ymchwil Deallusrwydd Artiffisial ar fyfyrwyr.

Wedi’i gyflwyno gan yr Academi Frenhinol Peirianneg gyda chefnogaeth gan Google DeepMind a Sefydliad Hg, darparodd y rhaglen Research Ready leoliadau ymchwil deallusrwydd artiffisial â thâl dros yr haf i 132 o fyfyrwyr o gefndiroedd difreintiedig ar draws 12 prifysgol yn y DU yn 2025, gan gynnwys deg myfyriwr o Met Caerdydd.

Canfu’r gwerthusiad fod cyfranogwyr wedi datblygu sgiliau ymchwil Deallusrwydd Artiffisial gwerthfawr, wedi ehangu eu rhwydweithiau proffesiynol ac wedi ennill mwy o ymwybyddiaeth o gyfleoedd astudio ar lefel ôl-raddedig swyddi yn y sector. Nododd mwy nag 85% o fyfyrwyr eu bod wedi cael profiad ymarferol o ymchwil a gyrfaoedd ym maes Deallusrwydd Artiffisial drwy’r rhaglen.

Cafodd Met Caerdydd ei hamlygu yn yr adroddiad am ei dull arloesol ‘stiwdio fenter’, sy’n cyfuno ymchwil Deallusrwydd Artiffisial ag entrepreneuriaeth a datblygu busnesau newydd. Nododd y gwerthuswyr fod y model wedi helpu myfyrwyr i ddeall sut y gellir trosi ymchwil yn gymwysiadau a chyfleoedd busnes yn y byd go iawn.

Roedd y Brifysgol hefyd yn un o ddim ond dau sefydliad a ddewiswyd ar gyfer ymweliad safle wyneb yn wyneb fel rhan o’r gwerthusiad, gan ganiatáu i ymchwilwyr gasglu adborth manwl gan fyfyrwyr a staff ar ddarpariaeth ac effaith y rhaglen.

Dywedodd yr Athro Sheldon Hanton, Dirprwy Is-Ganghellor Ymchwil ac Arloesi:

“Rydym yn falch o weld yr effaith gadarnhaol y mae Research Ready wedi’i chael ar ein myfyrwyr. Rhoddodd y rhaglen gyfleoedd gwerthfawr i ddatblygu sgiliau ymchwil Deallusrwydd Artiffisial uwch, i gael cipolwg ar lwybrau gyrfa yn y dyfodol ac i archwilio sut y gellir trosi ymchwil arloesol yn atebion ymarferol gydag effaith yn y byd go iawn. Mae’r gwerthusiad yn tynnu sylw at gryfder dull Met Caerdydd a’n hymrwymiad i ehangu mynediad at gyfleoedd ym maes technolegau sy’n dod i’r amlwg.”

Mae’r Academi Frenhinol Peirianneg wedi cadarnhau y bydd Research Ready yn parhau yn 2026, ac yn cael ei lywio gan ganfyddiadau’r gwerthusiad.