Ymchwilwyr Met Caerdydd wedi'u dewis ar gyfer rhaglen Crwsibl Cymru
Mae ymchwilwyr Met Caerdydd yn helpu i lunio dyfodol ymchwil yng Nghymru drwy eu dewis i raglen Crwsibl Cymru, menter arobryn ledled Cymru sy'n dod â 30 o arweinwyr ymchwil sy'n dod i’r amlwg at ei gilydd bob blwyddyn. Mae'r rhaglen yn hynod gystadleuol, ac mae'n cefnogi cyfranogwyr i ddatblygu sgiliau arwain ac archwilio sut y gall gweithio ar draws disgyblaethau helpu i fynd i'r afael â heriau allweddol sy'n wynebu Cymru.
Dewiswyd Dr Sheetal Menon, Dr José Castro a Dr Sandeep Singh Sengar ar gyfer carfan 2026 i gydnabod eu cryfderau ymchwil a'u potensial arweinyddiaeth.
Mae'r rhaglen Crwsibl wedi helpu’r tri i ddatblygu safbwyntiau newydd, ac i adeiladu cysylltiadau newydd a datblygu fel arweinwyr ymchwil.
Dr Sandeep Singh Sengar – Gwyddor data a gwneud penderfyniadau
Disgrifiodd Sandeep, y mae ei waith yn canolbwyntio ar ddulliau a gwneud penderfyniadau sy'n cael eu gyrru gan ddata, y profiad hyd yn hyn fel "gwerthfawr iawn".
Cysylltodd â chynrychiolwyr Llywodraeth Cymru, cyrff cyllido a llunwyr polisi, gan gael gwell dealltwriaeth o sut mae ymchwil yn cysylltu â gwneud penderfyniadau yng Nghymru.
"Mewnwelediad allweddol i mi yw sut y gall ymchwilwyr ac academyddion gydweithio'n fwy effeithiol â'r llywodraeth i greu effaith yn y byd go iawn", meddai.
Tynnodd sylw hefyd at fanteision gweithio gyda chydweithwyr o wahanol feysydd, rhannu syniadau a dysgu o ystod eang o safbwyntiau.
Dr Sheetal Menon – Cynaliadwyedd ac economi gylchol
Mae ymchwil Sheetal ar groesffordd cynaliadwyedd, economi gylchol ac arloesedd, gan wneud ffocws cydweithredol Crwsibl Cymru yn arbennig o berthnasol.
Disgrifiodd fod yn rhan o'r garfan fel "braint a chyfrifoldeb", ac mae wedi mwynhau cysylltu ag ymchwilwyr o bob disgyblaeth.
"Mae'r rhaglen wedi fy annog i feddwl yn fwy creadigol am sut i ddylunio ymchwil a'i gyfathrebu mewn ffyrdd sy'n fwy hygyrch ac effeithiol", meddai.
Mae'r ffocws ar arweinyddiaeth ac adrodd straeon hefyd wedi ei helpu i fyfyrio ar sut y gall ymchwil ymgysylltu â chymunedau yn well a llywio polisi.
Dr José Castro – Chwaraeon, iechyd a pherfformiad
Mae José, y mae ei waith yn canolbwyntio ar Chwaraeon ac Addysg Gorfforol, wedi mwynhau'r cyfle i gamu y tu allan i ffiniau academaidd traddodiadol.
"Mae'r sgyrsiau wedi bod yn wirioneddol ysgogol ac yn atgof gwych o werth camu allan o'n seilos academaidd ein hunain", meddai.
Mae Crwsibl Cymru wedi ei helpu i ddatblygu fel arweinydd ymchwil wrth archwilio cydweithrediadau newydd nad ydynt efallai yn dod i'r amlwg mewn lleoliadau mwy traddodiadol.
Oes gennych chi ddiddordeb mewn cymryd rhan? Bydd manylion am sut i wneud cais am Crwsibl Cymru 2027 yn cael eu rhannu yn nhymor cyntaf y flwyddyn academaidd nesaf.