Ymchwilydd Met Caerdydd yn archwilio sut y gall Deallusrwydd Artiffisial gefnogi addysg STEM gynhwysol

Mae llyfr newydd a gyd-awdurwyd gan ymchwilydd o Brifysgol Metropolitan Caerdydd yn taflu goleuni ar sut y gallai deallusrwydd artiffisial (AI) modern drawsnewid addysg STEM i bob dysgwr - yn enwedig y rhai ag anghenion ychwanegol.

Mae Inclusive Education: STEM in the Age of Modern AI, a gyhoeddwyd gan Routledge Taylor & Francis Group, yn dwyn ynghyd y datblygiadau diweddaraf mewn AI â dulliau ymarferol o addysgu cynhwysol. Mae Chaminda Hewage, Deon Cyswllt Ymchwil yn Ysgol Dechnolegau Caerdydd, yn un o bedwar awdur y gwaith.

Mae'r llyfr yn edrych ar sut y gall technolegau sy'n dod i'r amlwg — gan gynnwys deallusrwydd artiffisial cynhyrchiol a modelau iaith uwch — helpu i greu amgylcheddau dysgu mwy hygyrch a chefnogol mewn gwyddoniaeth, technoleg, peirianneg a mathemateg (STEM).

Mae'n cyflwyno fframwaith a gynlluniwyd i gefnogi myfyrwyr ag anghenion addysgol arbennig yn well, gan ddangos sut y gellir defnyddio offer AI i wella profiadau dysgu ac agor cyfleoedd newydd. Mae'n edrych ar sut mae addysg gynhwysol wedi datblygu dros yr 20 mlynedd diwethaf, a'r her barhaus o wneud dysgu'n hygyrch i bawb.

Dywedodd Dr Hewage: “Rydym yn archwilio sut y gellir defnyddio technolegau AI, megis AI cynhyrchiol a modelau iaith mawr, i gefnogi dysgu mwy personol a chynhwysol. Rydym hefyd yn archwilio sut y gall systemau AI helpu addysgwyr i ddeall emosiynau ac ymddygiad myfyrwyr, gan alluogi gwell cefnogaeth yn yr ystafell ddosbarth, yn ogystal â sut y gall helpu i wella dysgu i fyfyrwyr â nam ar eu golwg a'u clyw.

“Mae’r llyfr wedi’i anelu at gynulleidfa eang, gan gynnwys myfyrwyr, athrawon, ymchwilwyr, datblygwyr, gweithwyr gofal iechyd proffesiynol ac ymarferwyr diwydiant sydd â diddordeb yn nyfodol deallusrwydd artiffisial ac addysg.”