Sarah Thomas

Trosolwg

Mae arbenigedd addysgu Sarah Thomas wedi’i seilio ar waith cymdeithasol, gyda ffocws penodol ar lesiant plant a theuluoedd, amddiffyn plant, polisi cymdeithasol, ac effaith anghyfiawnder, tlodi ac allgáu cymdeithasol. Gan dynnu ar phrofiad helaeth o ymarfer proffesiynol, mae wedi ymrwymo i ddulliau addysgu a dysgu cynhwysol, sy’n seiliedig ar dystiolaeth, sy’n hyrwyddo ymgysylltiad myfyrwyr, myfyrio beirniadol, a chymhwyso gwybodaeth at ymarfer.

Dechreuodd Sarah ei thaith addysg uwch ar ôl symud o Orllewin Canolbarth Lloegr i Gymru ar ddiwedd yr 1980au i astudio polisi cymdeithasol. Yn dilyn ei hastudiaethau israddedig, cwblhaodd hyfforddiant gwaith cymdeithasol proffesiynol yng Nghaerdydd a sicrhaodd swydd fel gweithiwr cymdeithasol o fewn tîm plant a theuluoedd yn Ne-ddwyrain Cymru, gan symud ymlaen yn y pen draw i fod yn Uwch Ymarferydd Gwaith Cymdeithasol. Yn ystod y cyfnod hwn, gweithiodd yn helaeth ym meysydd amddiffyn plant, maethu, mabwysiadu, ac ymarfer yn gysylltiedig â’r llys. Ochr yn ochr â’i chyfrifoldebau proffesiynol, cefnogodd fyfyrwyr gwaith cymdeithasol ar leoliad, profiad a feithrinodd ddiddordeb parhaol mewn addysg a datblygiad ymarferwyr y dyfodol.

Wedi hynny, symudodd Sarah i weithio ym maes Addysg Bellach, gan addysgu ar draws rhaglenni iechyd, gofal cymdeithasol ac addysg. Darparodd y rôl hon sylfaen gref ar gyfer cyflwyno cwricwlwm, asesu, a dysgu sy’n canolbwyntio ar y myfyriwr, gan atgyfnerthu ei hymrwymiad i ehangu cyfranogiad a chreu llwybrau i Addysg Uwch.

Yn 2003, ymunodd Sarah â Phrifysgol Metropolitan Caerdydd (UWIC bryd hynny) fel aelod o’r tîm gwaith cymdeithasol. Ers hynny, mae hi wedi arwain a chyfrannu at ddatblygu a chyflwyno rhaglenni achrededig yn broffesiynol wrth ymgymryd ag amrywiaeth o rolau arweinyddiaeth academaidd. Mae’r rhain wedi cynnwys cyfrifoldebau dros brofiad myfyrwyr, Cyfarwyddwr Rhaglen ar gyfer y rhaglenni gwaith cymdeithasol Israddedig ac Ôl-gymhwysol, recriwtio a dethol, a mentrau a gynlluniwyd i wella ymgysylltiad a llwyddiant myfyrwyr.

Yn fwy diweddar, gwasanaethodd Sarah fel Deon Cyswllt ar gyfer Ymgysylltu â Myfyrwyr yn Ysgol Addysg a Pholisi Cymdeithasol Caerdydd ac mae hi bellach yn rôl Ddirprwy Ddeon Dros Dro. Yn y swydd hon, mae hi’n darparu arweinyddiaeth strategol a gweithredol ar draws portffolio academaidd amrywiol, gan weithio gyda chydweithwyr a myfyrwyr i wella ansawdd yr addysgu, cryfhau canlyniadau myfyrwyr, a chefnogi uchelgeisiau strategol ehangach y Brifysgol.

Yn 2024, dechreuodd Sarah Ddoethuriaeth Broffesiynol rhan-amser mewn Addysg ym Mhrifysgol Metropolitan Caerdydd. Mae ei hastudiaethau doethurol yn cyd-fynd â’i diddordeb hirhoedlog mewn ehangu cyfranogiad, ymgysylltiad myfyrwyr, a llwyddiant myfyrwyr, gan roi pwyslais ar brofiad myfyrwyr benywaidd annhraddodiadol a sut y gallai hyn lywio sut i gadw myfyrwyr mewn Addysg Uwch.

Drwy gydol ei gyrfa, mae gwerthoedd cyfiawnder cymdeithasol, cynhwysiant, partneriaeth ac eiriolaeth wedi aros yn ganolog i’w dull o addysgu, arwain ac ysgolheictod.