Dyfarnwyd Doethuriaeth Anrhydeddus i Mark Dacey am gyfraniad rhagorol i addysg

Mae Mark Dacey, Pennaeth a Phrif Swyddog Gweithredol Grŵp Colegau NPTC, wedi derbyn Doethuriaeth Anrhydeddus gan Brifysgol Metropolitan Caerdydd i gydnabod ei gyfraniad eithriadol i addysg bellach, datblygu sgiliau a bywyd cyhoeddus yng Nghymru.

Gyda gyrfa sy’n ymestyn dros bron i dair degawd mewn arweinyddiaeth uwch, mae Mark wedi chwarae rhan drawsnewidiol wrth lunio addysg bellach ledled Castell-nedd Port Talbot a de-orllewin Cymru. Ers dod yn Brifathro Coleg Castell-nedd Port Talbot yn 2004, ac yn ddiweddarach yn Brif Weithredwr y Grŵp yn 2013, mae wedi arwain y sefydliad drwy dwf a newid sylweddol, gan ei sefydlu fel darparwr addysg a hyfforddiant mawr sy’n diwallu anghenion dysgwyr, cyflogwyr a chymunedau.

Mae taith Mark i fyd addysg yn enghraifft ysbrydoledig o ddysgu gydol oes a symudedd cymdeithasol. Ar ôl gadael yr ysgol yn 15 oed heb unrhyw gymwysterau ffurfiol, aeth ymlaen i golegau addysg bellach cyn symud ymlaen i addysg uwch ym Mhrifysgol Caerdydd, Coleg Polytechnig Cymru ar y pryd a Phrifysgol Strathclyde. Ers hynny mae wedi adeiladu portffolio helaeth o gymwysterau academaidd a phroffesiynol ac mae’n Gymrawd o Sefydliad Brenhinol y Syrfewyr Siartredig (FRICS).

Mae ei yrfa wedi cwmpasu rolau ar draws addysgu, datblygu cwricwlwm a rheolaeth uwch yng Nghymru a Lloegr. Ym 1999, cafodd ei benodi gan Gyfrin Gyngor y Frenhines yn un o Arolygwyr Addysg a Hyfforddiant Ei Mawrhydi, gan gyfrannu at oruchwyliaeth a gwelliant cenedlaethol ar draws pob sector. Ar y cyd â’i gyfrifoldebau gweithredol, mae Mark yn Gadeirydd yr Uned Hawliau Plant, yn aelod o’r Bwrdd Gwasanaeth Cyhoeddus, yn aelod o Grŵp Arweinyddiaeth Plant a Phobl Ifanc, yn aelod o Grŵp Arweinyddiaeth Adeiladu Cymunedau Diogel a Chryf, yn Gadeirydd Pwyllgor Negodi Cymru ar gyfer Addysg Bellach ac yn Gadeirydd y Rhwydwaith 14-19. Mae’n parhau i ddylanwadu ar addysg a pholisi cyhoeddus drwy ystod eang o rolau arweinyddiaeth ledled Cymru, gan gefnogi pobl ifanc, cymunedau a datblygiad rhanbarthol; gan gydbwyso’r cyflawniadau hyn ag ymrwymiad cryf i fywyd teuluol.

Dywedodd Mark: “Mae’n anrhydedd enfawr i gael derbyn y Ddoethuriaeth Anrhydeddus hon. Trawsnewidiodd addysg bellach fy mywyd, ac rwyf wedi ymroi fy ngyrfa i sicrhau bod gan eraill yr un cyfle i lwyddo. Mae’r gydnabyddiaeth hon yn adlewyrchu nid yn unig fy nhaith bersonol, ond gwaith cydweithwyr ar draws y sector sydd wedi ymrwymo i ehangu mynediad, cefnogi dysgwyr ac adeiladu cymunedau cryfach.”

Yr Athro Julia Longville, Deon Addysgu a Dysgu ym Met Caerdydd wnaeth enwebi Mark am y wobr, gan ganmol ei gyflawniadau proffesiynol a’i effaith ar eraill: “Mae Mark Dacey yn arweinydd eithriadol, mae ei yrfa yn ymgorffori gwerthoedd dysgu gydol oes, gwydnwch a gwasanaeth cyhoeddus. Mae ei ddylanwad ar addysg bellach yng Nghymru wedi bod yn ddwys, ac mae ei ymrwymiad i greu cyfleoedd i eraill yn ei wneud yn dderbynnydd gwirioneddol haeddiannol o’r anrhydedd hon.”