“Os yw'n teimlo'n frawychus, mae'n debyg ei fod yn iawn”: Myfyriwr Darlunio Met Caerdydd yn rhannu stori llwyddiant drwy Glirio

Mae graddedig o Brifysgol Metropolitan Caerdydd yn annog myfyrwyr i gofleidio’r system Clirio a dilyn eu hangerdd, ar ôl cymryd cam o ffydd a arweiniodd at lwyddiant arobryn.

Gwnaeth Rudaina Chowdhury, a astudiodd BA (Anrh) Darlunio yn Ysgol Gelf a Dylunio Caerdydd, gais i Brifysgol Met Caerdydd drwy'r broses Glirio ac ers hynny mae wedi ennill Gwobr y Deon a sicrhau cymrodoriaeth greadigol fawreddog.

Gan symud i Gymru o Fangladesh yn wreiddiol yn ystod pandemig Covid, mae Rudaina yn sôn am sut y gwnaeth ailddechrau ei hobi plentyndod o dynnu lluniau yn ystod y cyfnod clo ei helpu i ddod o hyd i ymdeimlad o reolaeth a chyfeiriad mewn cyfnod o ansicrwydd.

Er bod ei theulu wedi disgwyl iddi ddilyn gyrfa fwy traddodiadol i ddechrau, dewisodd ddilyn ei huchelgeisiau creadigol a gwneud cais i golegau celf.

Dywedodd Rudaina: “Ces i le mewn ysgol gelf yn Llundain ond yn anffodus roedd rhaid i mi wrthod gan fod cymhlethdodau ynghylch symud i Lundain. Roeddwn i'n teimlo fel pe bai fy mywyd ar chwâl, ond doedd e ddim. Mae pob dim yn gweithio yn y diwedd, mewn rhyw ffordd neu'i gilydd. Fe wnes i gais i Brifysgol Met Caerdydd drwy’r broses Glirio a chefais fy nerbyn i astudio BA Darlunio.”

Yn ystod ei gradd, datblygodd Rudaina hyder yn ei llais creadigol, gyda chefnogaeth tiwtoriaid a mynediad at ystod eang o gyfleusterau a thechnegau.

Dywedodd hi: “Byddai ein darlithwyr bob amser yn ein hatgoffa y gallwn wneud unrhyw beth a fynnwn, heb gyfyngiad. Roedd yn hanfodol bod allan o'ch parth cysur, a chymryd y naid o ffydd. Pan raddiais, cefais wobr y Deon a oedd yn swreal, ac rwyf mor ddiolchgar.”

Ar ôl graddio, dewiswyd Rudaina ar gyfer Cymrodoriaeth gystadleuol Cronfa Dyfodol Artistiaid, sy'n darparu gofod stiwdio, mentora a chefnogaeth datblygiad proffesiynol i artistiaid sy'n dod i'r amlwg.

Wrth fyfyrio ar ei thaith, mae hi'n annog darpar fyfyrwyr sy'n ystyried Clirio i fentro, hyd yn oed os yw'n teimlo'n ansicr.

“Os yw'n teimlo'n frawychus, yna mae'n golygu eich bod chi'n gwneud pethau'n iawn. Bydd pethau'n gweithio allan fel y bwriadwyd i chi.”

Mae Prifysgol Metropolitan Caerdydd bellach yn croesawu ceisiadau drwy Glirio, gan gynnig ystod eang o raddau creadigol sydd wedi'u cynllunio i helpu myfyrwyr i archwilio eu syniadau, meithrin sgiliau ymarferol a datgloi cyfleoedd gyrfa.

Sicrhewch eich lle ym Met Caerdydd ar gyfer mis Medi 2026 drwy chwilio am gwrs ar-lein, cysylltu â ni ar Sgwrs Fyw neu ffonio 0300 330 0755.